روهڙيءَ جي عيدگاهه (ماڳ): هيءَ عيدگاهه مغل دؤر جو اڏاوتي يادگار آهي. روهڙي شهر جي اولهه ڏکڻ ۾ هڪ ٽڪري تي قائم هيءَ عيدگاهه ٻن ايڪڙن تي محيط آهي. عيدگاهه کي چئني طرفن کان احاطو ڏنل آهي. عيدگاهه جي ديوار ٽن طرفن کان اُرهه جيتري ۽ اولهه طرف واري پاسي کان ڪجهه وڏي آهي. ديوار جي وچ ۽ ٻنهي ڪنڊن تي ننڍا ننڍا گنبذ ٺهيل آهن. وچين گنبذ ۾ محراب نصب آهي. ان محراب جي ٻاهرين طرف کان ديوار ۾ هڪ سفيد پٿر لڳل آهي، جيڪو مير معصوم بکريءَ جو ڪتبو آهي. سنڌ جي قديم آثارن جي ڊائريڪٽريءَ جي مصنفن هن ماڳ جو دؤر 1004هه ڄاڻايو آهي.